வேட்பாளர் பட்டியலிலும் இந்தி திணிப்பு! தமிழக வேட்பாளர்களின் பெயர்களை ஹிந்தியில் வெளியிட்ட பாஜக!

-MMH

                                            தமிழக சட்டமன்றத் தேர்தலில் போட்டியிடும் பாஜக வேட்பாளர்களின் பட்டியல், ஹிந்தியில் வெளியிடப்பட்டுள்ளது சர்ச்சையை ஏற்படுத்தியுள்ளது. ஒரே நாடு, ஒரே மொழி என்ற ரீதியில் இந்தியை திணிக்க, மத்திய அரசு தொடர்ந்து முயற்சிகள் மேற்கொண்டு வருவதாக அண்மைக் காலமாக பல்வேறு குற்றச்சாட்டுகள் எழுந்து வருகின்றன. அதேபோல், தமிழ்நாட்டு நாடாளுமன்ற உறுப்பினர்களுக்கு மத்திய அமைச்சர்கள் ஹிந்தியில்தான் கடிதங்கள் எழுதி வருகின்றார்கள். இதுவும் கடுமையான விமர்சனத்துக்குள்ளாகியுள்ளது.

'மத்திய அரசின் இந்தப் போக்கு தமிழுக்கு மட்டும் அல்ல, அனைத்து இந்திய மொழிகளுக்கும் எதிரானது. ஹிந்தி பேசாத மாநில மக்களின் உணர்வுகளை மதிக்க மாட்டோம். நாங்கள் சொல்வதைத்தான் கேட்க வேண்டும். நாங்கள் எழுதுவதைத்தான் படிக்க வேண்டும் என்கின்ற ஹிந்தி ஆதிக்க வெறி மனப்பான்மையே இது' என கடுமையான கண்டனங்கள் மத்திய அரசுக்கு எதிராக எழுந்து வருகின்றன.

இந்நிலையில், தமிழக சட்டமன்றத் தேர்தலில் அதிமுக கூட்டணியில் போட்டியிடும் 20 பாஜக வேட்பாளர்களின் பட்டியலை பாஜக டெல்லி மேலிடம் நேற்று வெளியிட்டது. அதில் வேட்பாளர்களின் பெயர்கள், அவர்கள் போட்டியிடும் சட்டமன்றத் தொகுதி உள்ளிட்டவைகள் ஹிந்தி, ஆங்கிலத்தில் மட்டுமே இடம் பெற்றுள்ளன. தமிழக சட்டமன்றத் தேர்தலுக்கான வேட்பாளார்கள் பட்டியல், தொகுதிகளை பாஜக ஹிந்தியில் வெளியிட்டுள்ளது, இதிலும் ஹிந்தியா என்கிற ரீதியில் சர்ச்சையை ஏற்படுத்தியுள்ளது.

-பாரூக்.