சேலத்தில் 595 பள்ளிகள் திறப்பு: உற்சாகமாக வந்த மாணவிகள்!!
-MMHஒன்றரை ஆண்டுகளுக்குப் பிறகு சேலம் மாவட்டத்தில் புதன்கிழமை முதல்கட்டமாக 595 பள்ளிகள் திறக்கப்பட்டன. மகிழ்ச்சியுடன் வந்த மாணவர்களை ஆசிரியர்கள் உற்சாகமாக வரவேற்று வகுப்பறைக்கு அனுப்பினர்.
கொரோனா பரவல் காரணமாக தமிழகத்தில் சுமார் ஒன்றரை ஆண்டுகளாக பள்ளி, கல்லூரிகள் மூடப்பட்டு ஆன்லைன் மூலமாக மாணவ மாணவியர் படித்து வந்தனர். இந்தநிலையில் நோய்த்தொற்று குறைவின் காரணமாக தமிழக அரசு பல்வேறு தளர்வுகள் அறிவித்து வருகிறது.
அதன்படி செப்டம்பர் 1 ஆம் தேதி முதல் 9 முதல் 12 வகுப்பு வரை பள்ளி, கல்லூரிகள் திறக்கப்படும் என தமிழக அரசு அறிவித்தது. சேலம் மாவட்டத்தில் உள்ள 595 உயர்நிலை மற்றும் மேல்நிலைப் பள்ளிகள் திறக்க நடவடிக்கை எடுக்கப்பட்டுள்ளது என முதன்மைக் கல்வி அலுவலர் முருகன் தெரிவித்திருந்தார்.
இந்த நிலையில் சேலம் அரசினர் மேல்நிலைப் பள்ளியில், பள்ளி திறக்கப்பட்டதால் மாணவிகள் மகிழ்ச்சியுடன் உற்சாகத்துடன் வந்தனர். மேலும் பள்ளி நுழைவு வாயிலில் அனைவருக்கும் கிருமி நாசினி மருந்து அளித்து கைகளை சுத்தப்படுத்திய பிறகே அனுமதிக்கப்பட்டனர். முகக் கவசம் அணிந்து இருக்கவேண்டும் என்று வலியுறுத்தப்பட்டது.
இதுதொடர்பாக மாவட்ட முதன்மைக் கல்வி அலுவலர் முருகன் கூறுகையில், அரசின் வழிகாட்டு நெறிமுறைகளை பின்பற்றி மாவட்டத்திலுள்ள 595 உயர்நிலை மற்றும் மேல்நிலைப் பள்ளிகள் திறக்க நடவடிக்கை எடுக்கப்பட்டுள்ளது என்றார்.
- Ln இந்திராதேவி முருகேசன், மகுடஞ்சாவடி கலையரசன்.
Comments